Kleinsus se klavier

"... Haar vingers ken die pad

opgesluit in wit en swart - 
Die klavier se grootste vreugde,
hartseer en verlange;
Verstaan die hart se diepste smart..."

As haar melodieë so inmekaar vloei

soos wat haar vingers oor die ivoor dans

en balke met note in haar geestesoog vorm

om nooit deur ander gesien te word nie

maar wel gehoor te word;

gevoel te word...

Dan meng haar musiek 

met die wysie 

wat jou hartsnare speel.

Dan vir 'n oomblik,

net een oomblik,

sal sy haar diepste binneste

met jou deel.

O, my siel, vind rus;

my hoop kom van God.

Só spreek Hy sonder woorde

tot jou gees -

dra Sy stem in Sy dienaar se akkoorde

om jou te bemoedig as dit voel 

of alles net te veel wil wees.

As sy begin speel

word ek stil

en luister

-veral in my donkerste uur-

na die bemoedigende geluide

van my kleinsus se klavier....